FNP Súdwest-Fryslân wol dat nei 25 jier fergaderjen de drokke ferkearsrûte fanôf de provinsjale N359 oer Himmelum en Warns nei Starum no einlik ris feilich makke wurdt. De, spesjaal foar dit knelpunt yn it libben roppen, wurkgroep fan pleatslike belangen hat it trasee jierren lyn al mei de gemeente Nijefurd bepraten, it wachtsjen wie noch op fierdere útwurking en oerlis mei de Provinsje Fryslân.
In wichtich ûnderdiel fan de plannen is de oanlis fan it noch ûntbrekkende stik fytspaad fan Warns nei Starum. Mei namme de skoalbern dy’t nei Bogerman yn Koudum fytse en de rekreative fytsers hawwe hjir baat by. It trasee foar de ûntsluting is planalogysk ‘obstakelfrij’ en makket ûnderdiel út fan it al troch de gemeenterie fan Nijefurd fêststelde bestimmingsplan. Nijefurd hie de plankosten al reservearre en ek by de nije gemeente Súdwest-Fryslân steane se as ‘planfoarming ûnslutingswei Starum’ yn de begrutting.
De FNP wol dat de gemeente faasje makket mei de oanlis fan dizze feilige dyk. Seker no’t der in twadde slûs mei besikerssintrum komt en Masterplan - Starum útfierd wurdt. Dizze ynvestearings hawwe in positive ynfloed op it tal toeristen dy’t nei rekreaasjestêd Starum ta komme. Tagelyk sil de ferkearsdrokte tanimme en moat der foar sawol de toerist as de eigen ynwenners in feilige dyk beskikber wêze.
De FNP fynt dat de nije dyk mei fytspaad bydraacht oan in better wen- en leefklimaat yn Himmelum, Warns en Starum en de wurkgelegenheid yn de rekreaasjesektor tegoede komt. De FNP wol dat it yn 2013 ta in útdragen saak komt en ropt tongersdei 13 desimber mei de lêste riedsfergadering fan dit jier it kolleezje op om foar 1 july 2013 mei in definityf foarstel nei de rie te kommen.
